Vorsten

Links: Vorst Peter I, rechts: Vorst Paul I

Vorst Peter I

Geboeëre op 11 (!) desember 1974 in Zitterdj, mer op ein paar jäörkes nao bön ich altiêd inwoeëner van Hael gewaesjtj. Al vanaaf 1984 bön ich lid van RKVV Hael of VV HEBES, zoeë wiej det op vandaag hètj. Ich woeën sins ein aantal jaor same mèt Inge Sniekers in oos geweljig huuske oppe Daleboswaeg.
Nao miên sjtudie MTS besjermings -en aafwèrkingstechnieken van Sint Lucas in Boxtel wirk ich al jaore mèt väöl plezeer es sjilder. Van jóngs aaf aan geneet ich van de meneer van vastelaovendj viere in Hael en mètloupe in de optocht of ein ekt opveure oppe bóntje aovendje waas den ouch vanzelfsjpraekendj.
Örges in 2005 waerdje ich gevraogdj óm de Gangmaekers Prins van 2006 te waere. Det jaor vergaet ich noeëts mieër en vanaaf toen is 't vastelaovesvirus aanwezig wiej noeëts teväöre. Vanaaf det moment zit ich in 't besjtuur en bön ich lid van de sjoeëne Raod van èllef. Same mèt alle Gangmaekers wil ich es Vorst de kómmendje jaore zörge det wae de sjtatus diej wae es VV de Gangmaekers höbbe, bliêve oêtdrage op ein vastelaoveswaerdige meneer. Ich priês mich gelökkig det ich det same mèt eine geweljige vent wiej Paul Flekken det moog doon.

 
Vorst Paul I

Geboeëre op 25 september 1981 in Remunj. Vanaaf 1992 woeën ich in Hael. Ieërst mèt pap en mam naeve de aoje Don Bosco zaal, daonao mèt miên vrouw Diana aan de Pieël en noe lekker in ós eige huuske oppe Apollosjtraot.
Naeve de Vastelaovendj is miêne groeëtste hobbie ós zuunke Quint. Sins 2004 wirk ich mèt väöl plezeer in 't Lampegat, Eindhove, biej eine boewmaterialegroeëthanjel.
Biej VV De Gangmaekers bön ich vanaaf 2005 aktief. In det jaor waerdje ich namelik Prins van Hael. Mèt de sjpreuk “Hael aan de Maas, Gaef Gaas" regeerdje ich ueëver 't Gangmaekersriek. Daonao bön ich mèt väöl leefdje en plezeer lid gewoeëre van de Raod van èllef. Naeve 't Vorstsjap bön ich aktief bènne 't Leedjeskonkoer en, net es Peter, in 't algemein besjtuur en 't dageliks besjtuur. In de toekoms zal ich mèt miêne kollega en vrundj Vorst Peter zörge väör ein "Gangmaekers waerdige" presentasie en oêtsjtraoling van ós sjoeën vastelaovesvereini¬ging.

Ós väörgengers Jan I, Lei I, Wim I, Jac I, Henk I, Jan II, Wiel I en Jos I höbbe in 't verleje geweljig werk geleverdj. Ziej zorgdje väör ein gesjpreidj bèdje. De oêtdaging väör ós waerdj noe: dit hoeëg nivo te haoje, mèt oze eige dreij en eige sjtiel.


Alaaf,
 
Vorst Peter I & Vorst Paul I