Nou ich kan uch vertèlle det ich det in eder geval neet in ein paar wueërd kan vertèlle. Doe zoojts ’t kónne vergeliêke mèt ein bedriêf. Ein bedriêf det ’t hieël jaor aktief is mèt es eindprodukt de Haelder Vastelaovendj mèt al ziên facette. ’t Bedriêf besjteitj oêt ein Besjtuur en daonaeve versjillendje kemissies, of wie dedjer wiltj, in bedriêfsterme; eine Raod van Besjtuur mèt versjillendje divisies óm in bedriêfsterme te bliêve.
In totaal besjteitj ’t gehieël oêt ein dieke hóngerd minse, num ’t personieël, waat op ein of anger meneer organizatories mèt de Vastelaovendj bezig is.
’t Sjoeëne van dees organisatie is det ’t personieël en bestuur besjteitj oêt alle range en sjtande oêt ’t dageliks laeve en det bènne dees organizasie ederein geliêk is en zich ouch zoeë veultj. ‘t “Salaris” van dees minse besjteitj neet oêt geldj, mer oêt “voldoening”, namelik de voldoening det ’n evenement sjlaagtj, of det d’r ein geweldjige Vastelaovesgezèt gemaaktj waerdj om mèr ein paar väörbeeldje te numme. Of waat dachtj gae van ’t voldaone geveul om diên kreatief ei kwiêt te kónne bie de kemissie woeë se in zits!
Den nog efkes get ueëver ’t eindprodukt, de Haelder Vastelaovendj.
Dae sjteitj volges mich op ein good nivo, en det al sinds väöl jaore. Det kumptj volges mich ómdet waat ich net al besjreve höb, ederein geliêk is en ouch ómdet d’r aan alle laeftieje gedachtj waerdj, zoeëdet de Haelse Vastelaovendj neet allein toegangkelik is väör ein selekt zelfdje gruupke minse mèt weinig aanwas, zoeëdet ’t op ein gegaeve moment wie ein kaes oêtgeitj. Intaegedeil, wae zeen allein mèr gruuj, zeker waat ’t gezins- en jeugdgebäöre betruftj ten tieje van de Vastelaovendj ! ’t Belangriekste van ein Vastelaoves Vereniging is desse perbeers de väörwaarde te sjöppe väör eine sjoeëne Vastelaovendj väör dien dörp of sjtad; en dao zeen wae oppe ieërste plaats mèt bezig. Toch perbere wae ouch de rest vanne provinsie aaf en toe ouch get te gaeve. Namelik, wae laote eder jaor ein paar lokaal artieste häör Vastelaovesleedje professioneel opnumme, waat al ein aantal kieëre ein LVK-finaleplaats hieët opgeleverdj.
Zoeë wie gae mesjiens waal zeetj, kan ich trots zeen óm Väörzitter (Prizzedent numme ze det biej ós) van dees Vereniging te zeen. En es gae dinktj, waat is det toch eine sjauvinist, den kan ich uch vertèlle det det kloptj waat dit betruftj. Want det hueërtj namelèk bie de eige Vastelaovendj !
Emile Gijsen
Prizzedent V.V. De Gangmaekers
Vastelaoves Vereniging de Gangmaekers, waat is det noe? Nou ich kan uch vertèlle det ich det in eder geval neet in ein paar wueërd kan vertèlle. Doe zoojts ’t kónne vergeliêke mèt ein bedriêf. Ein bedriêf det ’t hieël jaor aktief is mèt es eindprodukt de Haelder Vastelaovendj mèt al ziên facette. ’t Bedriêf besjteitj oêt ein Besjtuur en daonaeve versjillendje kemissies, of wie dedjer wiltj, in bedriêfsterme; eine Raod van Besjtuur mèt versjillendje divisies óm in bedriêfsterme te bliêve.