Haelder Joekskepelle

Vastelaoves Vereniging de Gangmaekers maag zich in ‘t gölle gezelsjap verheuge van mer leefst 3 Joekskepelle in häör midde. Neet allein ’t verleje van de Gangmaekers broesjtj dus van de fanatieke Joekskepelle, ouch de toekomst beedj ein aantrekkelik perspektief! De 3 kepelle die Hael vertaegewoeërdige op Joekskepellegebied:

De Baerekepel
De Baerekepel waerdje in september 1998 opgerichtj en is sindsdeen ein van de braniejmaekers die de vastelaovendj in Hael laote laeve! Bovendien behaoldje ziej ein indrukwekkendj aantal waalverdeendje prieze bie Joekskepelletreffe in gans Limburg. In 2008 waerdje ziej zelfs derdje op 't Limburgs Kampioensjap väör Zate Hermeniekes in Heitse.
Deze jeugdige groep is mèt det alles ein flinke bron van inspirasie väör de toekomst! Internet: www.baerekepel.nl

De Rettich Band
De Rettich Band is de kepel mèt de meiste ervaring op dit moment. Zoeë gave zie ein aantal goodverkochtje cd’s oet en behaoldje ze twieë kieër de twieëdje pries bie ’t Limburgs Kampioensjap väör Zate Hermenieje. Ouch maakdje ziej concertreize nao Belsj en Luxemburg. Ziej waerdje opgerichtj op vastelaoveszunjig 1988 en häöre naam kumptj aaf van 't aod-Limburgs gebroek hieël hel weg te renne es t'r get ergs sjtuit te gebeure. 't Oorsjpronkelikke red dich, verbasterdje door äövermatig drankgebroek al sjnel tot Rettich. Geheel ten onrechte veugdje dees kebaalmakendje knajers d'r de benaming Band aan toe. De groep is aevel altied ein zaate hermenie gewaesj en det zulle ze ouch waal altied blieve (joekskapel, joekshermenie, zaate kapel, joeksige zaatlep of zaate joeksers, net waat gae wiltj). Internet: www.rettichband.hyves.nl

Dameskapel De Wauwelnaze
Dameskepel “de Wauwelnaze” is opgerichtj op asgoonsdig 1991. De bezètting besjteitj oêt inkel vrouwluuj. Mèt 20 lede höbbe ze ein behueërlik groeëte kliek. ’t Instrementarium besjteitj nao eige zègke oêt goud, hout, koeëper, zilver en bling bling (‘t Is neet allemaol goud det blingtj!)
‘t Repertoire besjteitj oêt alle bekèndje nömmers van Hugo toet Martin. Waekeliks waere ze gedirizjeertj door de zeer gedöljige, röstige, zjwiegzame, coladrinkendje Martin Abels. Ze besjikke zelfs ueëver ein heuse fanklup: De Zauwelbaze. ‘t Rippetisielokaal höbbe ze bie café De Tram, bie Pelle en Jacqueline. De festiviteiten woeë ze allemaol al op höbbe gesjpeeldj is de Jaormertj, Kepelle festivals, vastelaovendj, Sinterklaos, Sinte Merte, Bontje Aovendje, Panhael Maritiem en edere goonsdig rippetisie. Favoriete drenkskes van de dames zeen Wauwelthee, koffie en fris väör de rippetisie, nao de rippetisie roeëd en gael sjoemendj vócht en väöl water!
Kortóm; Dameskapel De Wauwelnaze!
Internet: http://wauwelnaze.webklik.nl