Historie

Vastelaoves Vereiniging De Gangmaekers oêt 't Midde Limburgse Hael (Heel) besjteitj in 2011 45 jaor. Ze is dus opgerichtj in 1966. Det beteikentj neet detter in Hael pas Vastelaovendj (Carnaval) besjteitj sins det jaor. De aodjste bekèndje uuting van dit volksfieëst in Hael sjtamtj al oêt 1897.
Toen al versjeen ein gans in 't dialek gesjreve Vastelaovesgezèt "Den Draak". Oêt daen tiêd datere ouch de ieërste berichte ueëver Optochte op Vastelaoves zunjig. Toet aan de twieëdje werreldjoeërlog, waerdj wisselendj meljing gemaaktj van Optochte, bals, konzerte en dergelikke op de driej daag väör as goonsdig. Al dees aktiviteite woeëre in dae zin neet georganizeertj, det ze neet ónger de vlag van ein Vastela-oves Vereiniging sjtónge. Ein dergelikke Vereiniging óntsjtóng pas in 1946. Dees Vereiniging haaj de naam "D'n Draak". Dit verwiêsjtj nao de Drakelegende van Hael. In de jaore '30 waerdje zelfs ein Drakesjpel opgeveurdj, gesjreve door Panhaeldenieër pater Jacques Schreurs, lanjelik bekèndj door ziên "daagbook van eine herdershóndj". Dees ieërste Vastelaoves Vereiniging organizeerdje Bóntje Aovendje, regeldje Optochte en sjreef Vastelaovesgezètte. De ieërste Raod van Èllef waas väöral ein klup van vrunj. Abseluut hoeëgtepuntj van V.V. de Gangmaekers is väörluipig de organizasie van 't Groeët BCL Carnavalstreffe det Hael op 17, 18, 19 en 20 november 2005 op ziên gróndjveste leet sjödde.