Haels Volksleed

Tradisjoneel beginne väöl Gangmaekers evenemente ónger de klanke van ‘t Haels Volksleed.
‘t Ieërste koeplèt is ein algemein koeplèt, woeë in ein kritiese noot doorklinktj:
óndanks de foute diej in ‘t verleje gemaaktj zeen en woeë de gevolge nog van te merke zeen, is Hael ein fein dörp óm in te woeëne. Sint Lambaer sjleitj op ‘t Kathedraal Kapittel van ‘t Prins Bisdom Luuk, woeë Hael toet 1795 toe behueërdje en zellefs toet 1840 biej ‘t Bisdom allein.

‘t Twieëdje koeplèt is ein hiestories koeplèt: Sint Stefanes sjpriktj es petroeën vanne Kirk väör zich. De Haelder Draak in de dake legende kan verpersueënliktj waere in ‘t kwaod det ‘t dörp trof. De adelikke willekeur van de Grave van Häör, of dwaalhieëre es Napoleon en nazi Duitslandj. Noe höbbe wae in mindere maote mèt det soeërt kwaod te make, mer waal mèt anger minder gunstige zake es óntgrinjing en verregaondje indusjtrializasie mèt dao aan vas miljeu bederf. Door de henj inein te sjlaon en dao ‘t gooje oêt te destillere, boewe wae aan ein laefbaar Hael, woeë ouch oos kinjer ein fein besjtaon kónne opboewe.
‘t Derdje koeplèt is eine lofzangk op ‘t bluujendj vereinigingslaeve, variejerendj van kultuur toet sjport.

Wiej bekans van eder volksleed gebroekelik is, hooftj neet eder koeplèt gezónge te waere. Koeplètte twieë en driej kónne naogelang de aanleijing verwisseldj waere. Klik hiej om te beloêstere.
 
Tekst:
Hugo Luijten

Meziek:
traditional

Oetveurendje:
Jac Engelen, Wiel Drabbels, Bert Verkoulen, Hugo Luijten & Kinjerkoeër "de Vrolijke Noot"

Ieërste kouplet:
Jao, Hael, noe laot ós dich 'ns ieëre, jao, Hael, doe dörp van Sint Lambaer.
Al kreeg se sjlaeg te inkassere, en trok men tieënge dich van laer.
Al bös se neet wie lang geleje, versjtueërdj is noe dien aangezich.
Toch höb se ós nog väöl te beje, en hèls de kroeën nog opgerich.
Toch höb se ós nog väöl te beje, en hèls de kroeën nog opgerich.

Twieëdje koeplet:
Mèt Sint Sjtefanus es besjermhieër, 't kwaod van ieëwe aan de kantj.
D'n draak, es Hornes of ein dwaallieër, dae is al jaore aafgebrandj.
Kom, laot ós noe historie sjrieve, boew same aan ein laefbaar Hael,
Zoeëdet oos kinjer hiej ouch kónne blieve, en deile kónne in oos waelj.
Zoeëdet oos kinjer hiej ouch kónne blieve, en deile kónne in oos waelj.

Derdje koeplèt:
Van hoesoêt altied aeve vredig, dien dade zeen de mote waerd.
Ein dörp det zich zoeë hieët verenigtj, det is ein paradies op aerd.
Woeë sjoeëne kunst al waerdj bedreve, men sjportj mèt sjnelheid en mèt flair.
Woeë Vastelaovendj puur is gebleve, jao, in zó'n dörp, dao woeën ich gaer.
Woeë Vastelaovendj puur is gebleve, jao, in zó'n dörp, dao woeën ich gaer.