Welkom op www.gangmaekers.nl!
V.V. de Gangmaekers, häör Hoofdsjponsore en häör Vrunj heite uch van herte welkom op oos thoêsblaad! Óm volledig oppe hueëgdje te bliêve van de lèste óntwikkelinge nueëdige wae uch oêt óm regelmaotig ein blik op oos prónksjtök te werpe.

De Gangmaekers pakke oêt!
vriedig 3 fibberwarie 2012
Gae höbtj nog ein paar waeke óm eur pekske aaf te make, want zaoterdig 18 fibberwarie is 't weer zoeë wiêd: Pekskesaovendj in 't Gangmaekersriek! Den kómme de vastelaovespekskes tevueërsjien en laote de Haelse vastelaovesveerders zeen waat ze geneijdj, gefoddeldj en biejein gezóchtj höbbe. Pekskesaovendj is al jaore ein geweljig evenement. De organisasie mós den ouch en hieël good program höbbe óm väörige jaore te evenare en det is häör döbbel en diek gelöktj! Mèt toppers oêt de Haelse en Limburgse artieste werreldj geitj 't flink d'r aan in CC Don Bosco. Op pekskesaovendj traeje op : De HAP, Fabrizio, De Baerekepél, Toddezèk, Eine pot zaat, 3 x Nixs, Net genóg, Niks moog, Sjingboem en de Haelder Hofkepél. Pekskesaovendj begintj óm 21:15 en de entree bedrueëgtj mer 5 euro.

Boorekapel door DIEK en DUN wintj Häötemetäotegeträöt!
zunjig 29 jannewarie 2012
'T waas weer herstikke vol, dae Don Bosco. Dèt is ouch neet zo gek; Oêt alle windsjtreke en van ueëver de provinsiegrenze kwame de beste zate hermeniekes, joekskepélle, träöterkepélle biejein väör de strijd om de felbegeerdje Häötemetäötegeträöt-trofee. Nao eine heftig sjlaagveldj en toeterendje oeëre, waas de winnaar van dit jäör bekintj; Door DIEK en DUN. Dees boorekapel oêt Grathem is al jäöre van de partie en zurgtj dèn ouch al jäöre väör 't op de kop kriege van de ganse zaal. Dit jäör waore zie zeker de terechte winnaar en moge zie ein jäör geneete van dae sjoeëne felbegeerdje Häötemetäötegeträöt-trofee. Door DIEK en DUN, van herte prefisiat! De Faldara trofee is gewonne door de Baerekepel. Ouch gae van herte prefisiat. ( Klik hiej väör de foto's van 't Häötemetäötegeträöt )

Prinseresepsie van VV De Gangmaekers
zunjig 29 jannewarie 2012
Zunjig 12 fibrewarie is de Prinseresepsie van VV De Gangmaekers. Ut is ein van de sjoeënste daag väör Prins Pascal I en Jeugdprins Bas I en häör gevolg. Eine daag dèt ziej volledig in ut middelpuntj staon. Op de Prinseresepsie is t’r namelik de mäögelikheid om ’t Prinselik en Jeugdprinselik driesjpan van Hael te fillesetere. Eine onvergaetelikke middig väör de Dorstlustige Hoeëghede van Hael, Prins Pascal I en Jeugdprins Bas I, mede dankzij de aanwezigheid van vrunj, femielie, collega’s, klubkes van binnen de Haelder Vastelaovendj en anger vereniginge van binnen en van boëte Hael. De prinseresepsie begintj om 11:11 en is in de Don Bosco. Ouch gae zeetj natuurlik van hèrte welkom op dees resepsie woeë vasteloavendj vieërendj Hael ich leutj zeen.

Dao kumptj Den Draak!
woonsdig 18 jannewarie 2012
De gezèt waerdj woonsdig 1 fibberwarie  2012 vanaaf 17.00 oer hoês aan hoês verkochtj. Ziêne Dorstlus-tige Hoeëgheid de Gangmaekersprins, ziên Adjedante, de Vorst, de Raod van Èllef en anger prominente Gangmaekers zólle in Hael langs de däör de Vastelaovesgezèt “Den Draak” te verkou¬pe. Väör dees dieke gezèt betaaltj gae den € 4. Nao 1 fibberwarie is Den Draak verkriêgbaar väör 't zelfdje bedraag biej DA Drogist Henckens en biej Bekker Abels.

Pascal I 46e Prins VV de Gangmaekers!
zunjig 08 jannewarie 2012
In ein kolkendj Don Bosco waerdje op ‘t Prinsebal aafgeloupe zaoterdig Pascal Rijckx oêtgerope es 46e Prins van de Gangmaekers. Hieël ‘t vastelaovendj vierendj volk van Hael waas in groeëte getale aanwezig en rejageerdje entoezjas wiej Pascal I oêt de koeëker sjpróng. De noewe Prins van de Gangmaekers is 39 jaor en is eine geboeëre en getoeëge Haelder.
( Klik hiej väör de foto's van 't prinsebal )

Bas I Jeugdprins VV de Gangmaekers!
zunjig 08 jannewarie 2012
De sjpanning was te snieje... de lichte waare oêt inne zaal…de temperatuur steeg. Alle gangmaekers en gangmaekerinneks haaje dezelfdje vraog: Waem waerdj de noewe Jeugdprins. Diej vraog werdje gelukkig sjnel beantwoordtj...

Jeugdprins Bas I regeertj ein jaor langk ueëver alle Gangmaekerkes!

Lilian Timmermans en Wiel Ros benumdj toet ieërelede!
dinsdig 24 jannewarie 2011
Op ‘t Prinsebal zeen Lilian Timmermans en Wiel Ros benumdj toet ieërelede van VV De Gangmaekers. VV De Gangmaekers is trots op leeje wiej Lilian en Wiel. Zowel Lilian es Wiel höbbe organizatoriesj eine belangrijke stempel gehatj op de Haelder Vasteloavondj. Beije zeen mèt al häör offisjele funksies gesjtoptj en es bleik van waardering väör al häöre verrichdje inzèt, hieët het besjtuur doon besjloeëte häör de titel ieërelid van VV de Gangmaekers te verlieëne. Wae felisitere Lilian en Wiel van herte!

Geneet van ’t Seniore Matinee!
vriedig 30 december 2011
Op 14 fibrewari organisere de Gangmaekers eine fantastiese Seniore Matinee. ’t Belouftj weer eine ónvergaetelikke middig te waere mèt gerennomeerdje artieste wiej Berb & Gradus, Bieeingeraaptj, Bruno Majcherek en Jantje en Jupke. Daobiej gaeve de lokale gymgroep en dansgroep ein sjoeën optraeje in verbandj mèt ‘t 50-jaorig besjtaon van de Seniorenvereniging. De presentatie is in henj van Butereedner Peter Vaassen.’t Publiek waertj weer good in de watte gelag; prachtige optraejes én ederein kriegtj bie bènnekomst ein tas koffie mèt ein lekker sjtök vlaai aangeboeëje. Det is biej de pries inbegrepe, dus waat wiltj gae nog mieër? De Matinee begintj óm 14.11 oer in CC Don Bosco. De pries is € 8 äör ein kaertje. De väörverkoup sjtartj in de twieëdje waek van jannewari. De kaertjes zeen in de väörverkoup te kriege biej DA Drogist Henckens in Hael en biej Drogisterij Cor Delissen (ATEP) in Bieëgdje of per e-mail (secretaris@gangmaekers.nl). Zörgtj det gae der den sjnel biej zeet, want  dao zeen mèr ein beperktj aantal plaatse. De kaertjes zulle dén auch in  eine mum van tied oetverkochtj zeen.

zunjig 13 november 2011
Op ‘t hoeëgtepuntj van de 31e editie van ‘t Haelder Leedjeskonkoer waerdje de H.A.P. tot winnaar oetgerope. De winnendje sjlager hètj: “De Windjvogel”. Net genóg waerdje twieëdje mèt “Jónk zeen mèt Vastelaovendj” en Eine pot zaat behaoldje de derdje plaats mèt ‘t leedje “dao doon ich ‘t väör”. D’r deje dit jaor 9 leedjes mèt aan ‘t konkoer, nao ‘t tèlle van de sjtumme van zaal- en vakjury ginge d’r 4 leedjes door nao de finale.
( Klik hiej väör de foto's van 't leedjeskonkoer )

Jac Engelen kriegtj "Orde van Verdeenste"!
maondig 21 november 2011
Aafgeloupe zaoterdig , väöraaf aan ut Leedjeskonkour, haet Jac Engelen welverdeentj de "Orde van Verdeenste" gekrege. Jac waas in 1991 Prins van de Gangmaekers en is nog altied aktief binnen de vastelaovesvereniging. Zooë is Jac op dit moment betrokken biej de vastelaovesgezet en maaktj hae deil oêt van de vastelaovesdeenskemissie. Hae sjrieft leedjes en steit minse biej mèt het vertale van tekste nao ut Haels. En es dèt nog neet genóg is, is Jac ouch nog lid gewaestj van de Raod van Ellef en van het besjtuur van V.V. De Gangmaekers. Al mel al verdeentj Jac ut om dees sjooën orde te kriege.

De Gangmaekers op You Tube!
woonsdig 12 oktober 2011
Op ôs eige kanaal, det se via internet kóns bekieke en beloestere, zeen alle Haelder sjlagers te huuere. ‘t You Tube-kanaal kin se bereike via de knop "Meziek".

Motto 2011-2012 bekindj: Dao doon wae ’t väör!
donderdig 17 mieërt 2011
Tradisiegetroew waerdj op vastelaovesdinsdig ’t motto väör ’t kòmmendj sezoen geprizzenteerdj. Zoeë ouch dit jaor. En waat väör ein motto! Ein motto woeë de gangmaekers en gangmaekerinnekes mèt kènne sjpele en ’t kènne gebroêke väör beväörbeeldj eine Haelder sjlager, väör ein optraeje biej de bòntje aovendj of beväörbeeldj als insjpirasiej väör de optochtj.