Datum: Evenement:
10/11-09-2011 Gangmaekersweekend (Thema Oktoberfest)
29-10-2010 Jaorvergadering
12-11-2011 Leedjeskonkoer
07-01-2012 Kaartverkoup Bóntje Aovendje/Bóntje Middig
07-01-2012 Prinsebal
20/21-01-2012 Bóntje Aovendje
21-01-2012 Baeremiddig
22-01-2012 Bóntje Middig
28-01-2012 Häötemetäötegeträöt
01-02-2012 Gezètteverkoup
12-02-2012 Prinseresepsie
14-02-2012 Seniore-matinee
16-02-2012 Jeugd-Sjläötelueëverdracht
17-02-2012 Sjläötelueëverdracht
18-02-2012 Vastelaovesdeenst
18-02-2012 Pekskesaovendj
19-02-2012 Groeëte Optocht
20-02-2012 Klonetrèkke
21-02-2012 Kinjeroptocht
Pyamabal mèt aafsjloeting Jeugdvastelaovendj
Aafsjloeting vastelaovendj en Groeëte Waever
Gangmaekersweekend (Thema Oktoberfest)
Wannieër : 10/11-09-2011
Plaats : Ardenne
Waem : De Prins, Adjudante, Raod van XI, Hofkapel, besjtuur en
alle kemissielede, alle leeje van de VV mèt häör partners
Eder jaor organiseertj Vastelaovesvereniging de Gangmaekers ein geweldig gezellige weekend-trip. De Prins, Adjudante, Raod van XI, Hofkapel, besjtuur en alle kemissielede waere den -mèt häör partners- in de gelaegeheid gesjtèldj om weer 'ns biej te kalle, óm herinneringe op te haole en óm väöroet te kieke nao de kómmendje vastelaovendj! Dit weekendje-weg vintj traditiegetrouw altied plaats in ’t weekend nao de Haelder kèrmes. ’t Thema is dit jaor Oktoberfest! Sjrief uch daoróm sjnel via het in via het insjriefformulier! (Klik hiej om het insjriefformulier te downloade).
Leedjeskonkoer
Wannieër : 12-11-2011
Aanvang : 20:11
Plaats : C.C. Don Bosco, Monseigneur Savelbergweg 100, Hael
Waem : Ederein
Entree : Gratis
Waem sjrieftj de sjlager van 2012? Waem moog de baeker mèt de groeëte oeëre mèt heives numme? Waem moog op de cd? En waem wètj, mesjien nao de zoepkoel? Op 12 november zulle wae ‘t weite, want den sjtuit de Leedjesaovendj op ‘t program. Get later es anger jaors, mer eur inzending mót aevegood uterlik op 1 september bènne zeen! Väör de leedjes¬sjrievers mèt get minder inspiratie hieët de Leedjeskemissie eine tip: ’t mót neet, mer gae kóntj uch laote inspirere door ’t jaormotto. De noewe opzèt van väörig väörig jaor is good bevalle, dus dae moog blieve. Det beteikentj det de ganse bloodstollendje wedsjtried inclusief de ontknuiping op eine aovendj plaatsvintj. De winnaar waertj bepaoldj door de vakjury en de zaaljury.
Leedjessjrievers kónne tot uterlik 1 september as. häöre tekst en eventueel meziek op pepeer of es mp3 per e-mail aanlevere biej de Leedjeskemissie: leedjeskemissie@gangmaekers.nl of biej:
Paul Flekken, Apollostraat 37, 6097 CG Hael. Insjriefformulere en reglemente zeen ouch op dees adresse op te vraoge, mer ze zeen ouch te vinje op oze website onger de knop " Downloads " .
Dus: dootj ‘ns gek en dootj mèt!
Kaartverkoup Bóntje Aovendje/Bóntje Middig
Wannieër : 07-01-2012
Aanvang : Van 13.30 toet 14.00 oere väör lede,
van 14.00 toet 14.30 oere väör neet-lede.
Plaats : C.C. Don Bosco, Monseigneur Savelbergweg 100, Hael
Waem : Ederein
Entree : € 8,-
Op de middig väöraafgaondje aan 't Prinsebal hèltj Vastelaoves Vereiniging de Gangmaekers väörverkoup väör kaarte van de Bóntje Aovendje. Vanaaf 13.30 oere tot 14.00 oere waere Gangmaekers-lede in de gelaegenheid gesjtèldj om kaarte te bemachtige. Vanaaf 14.00 oere toet 14.30 oere waere anger belangsjtèllendje in de mäögelikheid gesjtèldj max. 6 kaarte
per persoon aan te sjaffe. Mochte d’r nao deze verkoupdatum nog kaarte uuever zeen, den zeen dees verkriegbaar bie oze hoeswinkel, Drogisterij Henckens dörpsjtraot 44 Hael
Prinsebal
Wannieër : 07-01-2012
Aanvang : Entree oeëpe vanaaf 19.00 oere, aanvang 20.11 oere.
Plaats : C.C. Don Bosco, Monseigneur Savelbergweg 100, Hael
Waem : Ederein
Entree : Geine entree
De Prins waerdj oetgerope op ziene eige soirée : ’t Prinsebal. Ieërst waerdj de aoje Jeugdprins en Prinses opgenómme in de HAJ (Haelder Aod Jeugdprinse en Prinsesse). Daonao waerdj de Gangmaeker van ’t Jaor bekèndj gemaaktj. Dae ieërepries geit nao daegene dae mieër es alle angere –los van de Vereiniging- opveel es echte Carnavalist. Vervolges traeje de Prins van ’t väörig jaor en zien Adjedante aaf en numme zitting in de HAP (Haelder Aod Prinse) en AAP (Aod Adjedante Pilleton). Den is ’t tied väör ’t moment woeë ederein väör is gekómme; ’t oetrope van de noewe Gangmaekers Jeugdprins, Prinses en Adjedant en daonao in de groeëte finale 't oetrope van de Prins van de Gangmaekers en zien gevolg.
Bóntje Aovendje/Bóntje Middig
Wannieër : Bóntje Aovendje : 20/21-01-2012
Bóntje Middig : 22-01-2012
Aanvang : Bóntje Aovendje : Entree oeëpe vanaaf 19.00 oere,
aanvang 19.45 oere.
Bóntje Middig : Entree oeëpe vanaaf 13.00 oere,
aanvang 13.45 oere.
Plaats : C.C. Don Bosco, Monseigneur Savelbergweg 100, Hael
Waem : Ederein
Entree : € 8,-
De good verzörgdje Bóntje Aovendje zeen väör väöl Haelder minse (mer ouch väör väöl neet-Haelder, aod-Haelder en anger luuj die van de gulle lach haoje) ein van de hueëgtepuntje in ’t väörsezoen vanne Vastelaovendj. Dees aovendje sjtaon garant väör plezeer, show en amuzement! En det allemaol door eige Haelder artieste! Die zeen döks halverwaege ’t jaor al bezig mèt bedinke, lache en rippetere. ’t Rezultaat maag d’r den ouch al jaore zeen! Kaarte väör de Bóntje Aovendje zeen allein te verkriege in de väörverkoup op zaoterdigmiddig 8 jannewarie in C.C. Don Bosco, of bie de Gangmaekers-shop: Drogisterij Henckens.
Baeremiddig
Wannieër : 21-01-2012
Aanvang : Entree oeëpe vanaaf 13.30 oere, aanvang 14.11 oere.
Plaats : C.C. Don Bosco, Monseigneur Savelbergweg 100, Hael
Waem : De Jeugd van Hael
Entree : € 1,- väör kinjer en € 3,- väör volwassene
De zaoterdigmiddig van de Bóntje Aovendje is de zaal d’r väör de kinjer. Die höbbe den häöre eige bóntje middig, sjterker nog: eine Baere Middig. ’t Podium is den vriej väör acts van en door kinjer, väör kinjer. ’t Ein toneelsjtök is nog neet aafgeloupe of de anger playback-act sjteitj alweer te trappele van jeugdig entoeziasme. Muzikaal omliesting waerdj uiteraard verzörgdj door de Baerekepel!
Häötemetäötegeträöt
Wannieër : 28-01-2012
Aanvang : Entree oeëpe vanaaf 19.30 oere, aanvang 20.11 oere.
Plaats : C.C. Don Bosco, Monseigneur Savelbergweg 100, Hael
Waem : Ederein
Entree : Geine entree
Ein paar waeke väör de Vastelaovendj vormtj C.C. Don Bosco in Hael ’t dekór väör ein geweljige biejeinkómst van ein aantal zate hermenieje, joekskepelle, prinsekepelle, träöterkepelle, etc. oet gans Limburg. En neet zoeë mer get kepelkes, mer de hotemetoten, de Häötemetäöte dus, op ’t gebied van träöte!
Gezètteverkoup
Wannieër : 01-02-2012
Aanvang : Vanaaf 17.00 oere
Waem : Ederein
Entree : € 4,-
Ziene Dorstlustige Hoeëgheid de Gangmaekersprins, zien Adjedante, de Vorst, de Raod van XI en anger prominente Gangmaekers zólle in Hael langs de däör ’t Hoesorgaan van V.V. de Gangmaekers; Vastelaovesgezèt “Den Draak” verkoupe.
Prinseresepsie
Wannieër : 12-02-2012
Aanvang : vanaaf 11.11 oere
Plaats : C.C. Don Bosco, Monseigneur Savelbergweg 100, Hael
Waem : Ederein
Entree : Geine entree
Op de Prinseresepsie is t’r de mäögelikheid om ’t Prinselik en Jeugdprinselik driesjpan van Hael te fillesetere. Eine onvergaetelikke middig väör de Dorstlustige Hoeëghede van Hael, mede dankzij de aanwezigheid van vrunj, femielie, collega’s, de HAP, de AAP, de HAJ, kollezje van B&W en anger belangsjtèllendje. Hie zeen ouch alle anger Vastelaoves Vereiniginge te vinje, die allemaol häör opwachting kómme make bie de Gangmaekersprinse. De geleefdjheid van de Haelder Hoeëghede zörgtj t’r väör det de resepsie pas róndj de aovendjinval toet ein inj kumptj.
Seniore-matinee
Wannieër : 14-02-2012
Aanvang : 14.11 oere
Plaats : C.C. Don Bosco, Monseigneur Savelbergweg 100, Hael
Waem : De Haelder seniore
Entree : € 8 (inklusief koffie met vlaai)
Väör 't de derde kieër in zien roemruchte historie organiseertj Vastelaoves Vereniging de Gangmaekers ein sjpetterendj festijn väör de seniore van Hael. 't Belouftj ein ónvergaetelikke middig te waere met gerenommeerdje zengers, buuteredners en anger optraejes. Muzikale omliesting waerdj vanzelfsjpraekendj verzorgtj door de Haelder Sjtaar. Ein bezeuk van Ziene Dorslustige Hoeëgheid, de Gangmaekersprins mèt zien gevolg sjteit netuurlik ouch op 't programma. En es klap oppe väörpiel kriege de bezeukers bie bènnekomst ein tas koffie mèt ein lekker sjtök vlaai aangeboeëje. Waat wiltj gae nog mieër? Kaarte zeen verkriegbaar via e-mail: secretaris@gangmaekers.nl .
Jeugd-Sjläötelueëverdracht
Wannieër : 16-02-2012
Aanvang : 19.11 oere
Plaats : Wisselendj in dörpskerne van Gemeinte Maasgouw
Waem : Oettrèkkendj Jeugd-gezèlsjap
Entree : Gein
't Jeugdgezelsjap van V.V. de Gangmaekers maaktj op de donderdig väör de drie dolle daag ein bezeuk aan de Jeugd-Sjläötelueëverdracht van de Gemeinte Maasgouw. De Burgemeister drueëgtj den de macht symbolies väör drie daag ueëver aan de Jeugdprinse en gevolg door de gemeintesjläötels te ueëverhenjige. 't Evenement vindj jaorliks wisselendj plaats in de dörpskerne van Gemeinte Maasgouw.
Sjläötelueëverdracht
Wannieër : 17-02-2012
Aanvang : 20.11 oere
Plaats : Wisselendj in dörpskerne van Gemeinte Maasgouw
Waem : Ederein
Entree : Oettrèkkendj gezèlsjap
Op de vriedig väör de drie dolle daag bringtj de Gangmaekersprins höbbe de Gangmaekers de ieër de sjläötelueëverdracht van de Gemeinte Maasgouw te moge organisere. De burgemeister drueëgtj den de macht symbolies väör drie daag ueëver aan de Prinse door de gemeintesjläötels te ueëverhenjige.
Vastelaovesdeenst
Wannieër : 18-02-2012
Aanvang : 19.00 oere
Plaats : Parochie Sint Stefanus, Monseigneur Savelbergweg 93
Waem : Ederein
Entree : Geine entree
Op ein sjtielvol en waerdige meneer loedj Vastelaoves Vereiniging de Gangmaekers, de zaoterdigaovendj väör ’t sjpeel begintj, de Vastelaovendj in mèt de tradisjonele Vastelaovesmèsdeenst.Allebei de Gangmaekersprinse sjpele ein hoofdrol en gaeve op häör eige meneer invölling aan deze hoeëgsjtaondje deenst. Nao aafloup van deze deenst geitj ’t ganse gezèlsjap nao de pöt oppe Linj, woeë de Baer oet ziene wintjersjlaop waerdj gehoeëldj en de Vastelaovendj offisjeel waerdj ge-ueëpentj.
Pekskesaovendj
Wannieër : 18-02-2012
Aanvang : 21.15 oere
Plaats : C.C. Don Bosco, Monseigneur Savelbergweg 100, Hael
Waem : Ederein
Entree : € 5,-
Es kindj al vónje wae Pekskesaovendj ein van dé aovendje van ’t jaor. Vol sjpanning ueëver al ’t sjoeëns waat dich te wachte sjtóng; eine aovendj in ’t teike van prachtige pekskes! De zaoterdigaovendj väör de Vastelaovendj is eigelik net zoeëget. Offisjeel beginne die daag pas ‘s zunjigs, mer dae zaoterdigaovendj is al vol sjpanning ueëver al ’t sjoeëns waat ós te wachte sjteitj, vol plezeer en vol prachtige pekskes. Want dae zaoterdig prizzentere väöl Haeldjer luuj zich väör d’n ieërste kieër in ’t Vastelaovespekske woeë ze ’t ganse jaor aan gesjoesterdj, genejdj en gesjläöteldj höbbe. Mèt laevendje meziek van diverse toppers oet de Limburgse artiestewerreldj geitj 't den flink d'r aan. En den mót de Vastelaovendj dus eigelik nog beginne…
Groeëte Optocht
Wannieër : 19-02-2012
Aanvang : 14.11 oere
Plaats : Sjtraote van Hael
Waem : Ederein
Entree : Geine entree
Op zunjigmiddig trèktj de Optochtsjtoet door de sjtraote van Hael. Al in 1897 trok de ieërste vastelaovesoptocht door Hael en daomèt is ’t zelfs ein van de aodste Optochte van Limburg. In 1897 sjreef Panhaeldenieër Sjang Bongaerts al ein vastelaovesleedje ueëver den Optocht van Hael, waat later zelfs ein van de aojdste vastelaovesleedjes bleek. En neet gans toevallig organiseerdje V.V. de Gangmaekers in 2005 väör ’t ieërst in de historie ein heus Limburgs Kampioensjap Vastelaovesoptochte. Den Optocht is dus absoluut de meujte van ’t bekieke waerd!Nao d’n Optocht waerdj Hael vanaaf 16.11 oere getrakteerdj op ein heus artiestegala in C.C. Don Bosco, woeënao de priesoettreiking plaatsvindj.
Klonetrèkke
Wannieër : 20-02-2012
Aanvang : 14.11 oere
Plaats : Haelder Kefees
Waem : Groeët en Klein
Entree : Geine entree
Op de maondig van de Vastelaovendj nueëdigtj Vastelaoves Vereiniging de Gangmaekers groeët en klein oet väör ’t Klonetrèkke. Vanaaf 14.11 oer löptj Hael oet óm de plaatselikke kefees róndj te gaon. In eder kefee is d’r de mäögelikheid om gesjminktj te waere en daobie zeen d’r sjpesjaal väör de kinjer presentjes in eder kefee. Nao de kroegetocht door Hael mót groeët en klein gesjminktj zeen en begintj om 17.11 oere in C.C. Don Bosco ’t Klonebal van HePaPolOs.
Kinjeroptocht
Wannieër : 21-02-2012
Aanvang : 14.11 oere
Plaats : Sjtraote van Hael
Waem : Ouch groeët, mer väöral Klein
Entree : Geine entree
Op de dinsdigmiddig trèktj de Kinjeroptocht door de sjtraote van Hael.
Nao den Optocht waerdj Hael getrakteerdj op ein echt artiestegala in C.C. Don Bosco, woeënao de priesoetreiking róndj 17.11 oere plaatsvindj. Daonao zal róndj de aovendjinval op de klanke van de waever, Ben de Baer ingepaktj waere en door de Raod van XI weggedrage waere en is de vastelaovendj väör de kleinste jeugd van Hael väörbie.
Pyamabal mèt aafsjloeting Jeugdvastelaovendj
Wannieër : 21-02-2012
Aanvang : 19.11 oere
Plaats : C.C. Don Bosco, Monseigneur Savelbergweg 100, Hael
Waem : Ouch groeët, mer väöral Klein
Entree : Geine entree
Op ’t Pyamabal sjloetj de Jeugd van Hael de vastelaovendj aaf. Ónger aanveuring van ’t Jeugdprinselik drietal en de Jeugdraod danstj men om 21.11 oere de Jeugdwaever. De Jeugdvastelaovendj is daonao väörbie.
Aafsjloeting Vastelaovendj en Groeëte Waever
Wannieër : 21-02-2012
Aanvang : 22.11 oere
Plaats : C.C. Don Bosco, Monseigneur Savelbergweg 100, Hael
Waem : Väöral groeët
Entree : Geine entree
Op de klanke van de Hofkepel en ónger aanveuring van de Gangmaekersprins, Adjedante, Vorst en Raod van XI belaeftj vastelaovendj verendj Hael häör lèste eurkes. Net väör ’t begin van det lèste eurke zal Prizzedent Emile es väöroetblik op ’t noew Vastelaovesseizoen de titel van ’t noew Jaormotto onthulle. Om 0.00 oere vèltj den ouch ’t dook väör de “groeëte” minse in Hael. Den waerdj bie ’t Gangmaekersbeeldj ónger de klanke van de Groeëte Waever aafsjeid
genómme van de Vastelaovendj.
