Vastelaoves Vereniging de Gangmaekers is al sinds lange tied in ’t prettige gezelsjap van ein eige Besjermvrouwe. Elies Pijpers-Stoks waerdje in 1998 geïnsjtalleerdj toet Besjermvrouwe van oos sjoeën Vereniging, nao al vanaaf 1983 lid te zeen gewaesjtj van ’t Algemein Besjtuur van “De Gangmaekers”. Mer waem is persies ’t gezicht achter oos Besjermvrouwe?
Om det en mieër te weite te kómme ging oos Gangmaekers-internetredaksie op audiensie bie de Besjermvrouwe.
Waem is Elies Pijpers-Stoks?
De Besjermvrouwe trouwdje in 1972 mèt aod-Adjedant vanne Gangmaekers en aod-Sjtadsprins van Remunj, Ghiel Pijpers.
Es óngersjeijing van häör gelökkig laeve same, móchte ze bliej waere mèt twieë prachtige kinjer: Femke en Martijn.
In 1986 begóste Elies en Ghiel in de geboeërtesjtad van Ghiel, Haerle, häör ieërste McDonalds restaurant.
In ’t ziekehoes van Remunj leerdje de Besjermvrouwe “häöre” Ghiel kènne, en same besjloeëte ze nao Hael te verhoêze. In Hael waerdje Ghiel ouch lid van 't Hoofdbesjtuur van de BCL, de Bondj van Carnavalsvereniginge in Limburg, woeëvan hae later zellefs de ieër haaj väörzitter te moge zeen.
Naodet de kinjer opgegruujdj woeëre is de Besjermvrouwe nao 18 jaor trök verhoesjtj nao de Väörsjtad van Remunj. Aevel blieftj ze de Gangmaekers en daomèt de Haelse Vastelaovendj troew es Besjermvrouwe en Besjtuurslid.
Geboeëre en getoge in ’t hertje van Remunj moge wae de Besjermvrouwe ein echt Uulemaedje neume.
Elies is de dochter van Lei en Lien Stoks, zöster van aod-Uuleprins Jos III en tante van naef Nard, dae in 1981 Jeugdprins van D’n Uul waas. Vader Lei waas jaorelang Sikkertaris van D’n Uul. Hae sjónk dertig jaor lang de prinsemöts van D’n Uul. Mooder Lien maakdje altied de pekskes van de Damesgarde.
Waat verbindj de Besjermvrouwe mèt Vastelaoves Vereniging de Gangmaekers?
In Hael waerdje echtgenoot Ghiel in 1982 Adjedant van Aod-Gangmaekersprins Peet I †. Dao-op volgendj noom Ghiel zitting in ’t Algemein Besjtuur van de Gangmaekers. Ein jaor later troeëj Elies ouch toe toet ‘t Algemein Besjtuur. Ze noom ‘t Sikkertariaatsjap van oos Vereniging korte tied op zich. Vanaaf daen tied is het same mèt echtgenoot Ghiel altied troew besjtuurslid gewaesjtj van oos Vereniging.
Wie is de Besjermvrouwe, Besjermvrouwe gewoeëre?
Toet eders dank bood Elies de Vereniging in 1996 aan om de rol van Besjermvrouwe op zich te numme. Al jaore langk sjponsordje ze de Vereniging op momente det ’t nueëdig waas. Daobie hieët ze same mèt häöre echtgenoot ein aantal jaore de garderobe van de Gangmaekers verzörgdj. Van de opbringste sjafdje ze jasse aan väör de lede van de Raod van XI.
Wie völtj de Besjermvrouwe häör taak in?
De Besjermvrouwe perbeertj häör taak in te völle door de Vereniging zoeëwaal nao boête es nao binne toe te sjteune. Zo sjteitj ze op eder gewènsjtj moment klaor óm de Vereniging van advies te väörzeen, sónger zorgvuldig häör positie oêt ’t oug te verleze. Want es Besjermvrouwe wiltj ze zich zoeë neutraal mäögelik opsjtèlle binne oos Vereniging.
Elies levertj daonaeve ouch jaorliks ein finansjele biedrage aan oos Vereniging. Ze investeertj väörnamelik in ekstra’s die door de Vereniging neet waere begroeëtj. Zo sjaft het óm de paar jaor väör de Vereniging ein gans noew Prinsepak aan of invesjteerdj het in noew sjteke väör oze Raod van XI. Of zoeë wie ’t zellef zieët: “Ich haoj väöral in de gate det miên menkes in Hael d’r eder jaor weer sjtiêlvol biej loupe”.
’t Zal uch vanwaege ’t boeëvesjtaondje waarsjienlik ouch neet verbaze es wae uch vertèlle det de aojers van oos Besjermvrouwe vreuger ein eige Hieëre modezaak haaje.
Zoeë wie gae laesjtj moge wae es Vastelaoves Vereniging de Gangmaekers grueëts zeen om zoeë ein betrokke Besjermvrouwe in oos midde te höbbe. Op häör eige meneer vertolktj zie al jaore ein belangrieke rol binne oos sjoeën Vereniging. En daomèt is zie mede verantjwoeërdelik väör de Vastelaovendj zoeë wie wae dae jaorliks weer moge belaeve in Hael.
